اسكندرية رايح جاي

ايديا ف جيوبي وقلبي طرب
سارح ف غربة بس مش مغترب
وحدي لكن ونسان وماشي كدة
ببتعد معرفش او بقترب
ببتعد معرفش او بغترب
ــــــــــ
ببتعد معرفش او بقترب
ولأول مرة احس الاحاسيس دي كلها في 3 ايام
واول مرة اشوف اسكندرية جميلة اوي كدة.. رغم انها جميلة على طول
يعني ايه غربة؟ انا بيتهيألي انها فقدان الاحساس بالالفة
انها البعد عن شارع كل الناس فيه بيتعاملوا معاك ولا كأنهم يعرفوك من سنين رغم انها اول مرة تشوفهم والاهم انك ماتحسش بغرابة دة
انه يكون عادي ان مافيش عربية تعدي بلا استثناء الا لما السواق يقولك العجلة نايمة يا مودام
انك تروح عند البنزينة عشان تزود هوا الراجل بتاع الهوا يقولك العجلة نايمة يا مودام
امال انا رايحة انفخ شفايفي يعني؟؟


بس ليه البعد بيخلي البيني ادم مدهون عسل وكل الناس هتوت عليه ويبقى حد مهم؟
عندك فكرة ولا انت اعد تاكل فشار وخلاص
ــــــــــ
سارح ف غربة بس مش مغترب

ممكن نرجع للغربة من فضلك
ولا هي الغربة ان كل الناس تضحكلك لو عايزين حاجة وبعد كدة لو انت عايز حاجة اديله تنفيض
ممكن تبطل فشار وتركز معايا
طب لو قولنا ان الغربة هي الحياه في بلد غريبة مع ناس غريبة بيتكلموا لغات غريبة وعادات غريبة واكل غريب ووحدة غريبة بعيد عن اي حاجة مش غريبة
يبقى ليه انا مش حاسة بغربة؟؟؟