البتاعة دي قديمة بفتح فولدر غلط نطت في وشي ولولا اني عارفة ان دة اسلوبي كنت قلت دي بتاعة اي حد لأني ماعنديش ادنى فكرة انا كتبتها امتى وازاي.. لكن جت في وقتها تماما وفي الصميم
يمكن اكون كتبتها وانا نايمة بما اني نايمة بقالي اربع ايام
او انا اخيرا حققت توقعاتي واتجننت
اني واي كفاية رغي سخيف واسيبني مع البتاعة اي بقول عليها

مش عارفة ليه.. احساسي فيه حنين غريب بيشدني
يرميني فيه ونروح بعيد.. على دنيا تانية مافيهاش جديد..
قديمة يمكن لكن الاكيد فيها حاجات بتهزني
احاسيس عنيفة.. اوقات سخيفة.. ومش دي الحكاية كلها
غلطات كتير وعملتها.. عدت وفات وقتها..
ولا كنت يوم قدها.. ولا عمري هاقدر احلها
ايام تفوت.. احلام تموت.. ويموت معاها حبها
حب الحياه.. مع كل اه.. وتبقى صورة مشوهة
وانا يادوب ببتدي..
لعب الحواه وانا م الهواه.. ويارتني كنت حسبتها
يمكن ماكنتش عشتها ومن البداية سبتها بدل ما اقول خلاص تعبت.. دي حاجة فات وقتها
اشباح همومي ماسكة ف هدومي وانا ورايا بجرها
تقلت عليا نزفت عنيا ونفسي حضن يضمني ويخف عني حملها
ورجعنا تاني للسكوت.. ورجعت الافكار تموت.. وكلامي دلوأتي انتهى

هو انا بكتب بقافية ليه؟؟